საპილოტე პროექტის პრეზენტაცია გურჯაანის მუნიციპალიტეტში


საქართველოს სოფლის მეურნეობის სამინისტრომ და გაერთიანებული სამელიორაციო სისტემების კომპანიამ კახეთის რეგიონში, გურჯაანის მუნიციპალიტეტში, სოფელ ბაკურციხის მოსახლეობას სატუმბი სადგურის რეაბილიტაციის საპილოტე პროექტი წარუდგინა. აღნიშნული სატუმბი სადგური ემსახურებოდა სოფელ ბაკურციხის  360 ჰექტარი სავარგულების მექანიკურ მორწყვას. დღეისათვის სადგური არ ფუნქციონირებს. საქართველოს გაერთიანებული სამელიორაციო სისტემების კომპანიის მიერ შემუშავებული პროექტის მიხედვით სადგური სამი სოფლის  - ბაკურციხე, კოლაგი და კარდენახი -  600 ჰექტარ სასოფლო-სამეურნეო დანიშნულების მიწის ფართობს უზრუნველჰყოფს სარწყავი წყლით.

პროექტში დამატებითი ტექნიკური კომპონენტებია გათვალისწინებული, რაც სადგურის ამუშავების შემდეგ მოსახლეობას   წვეთოვანი მორწყვის სისტემების გამოყენების საშუალებას მისცემს. წვეთოვანი სისტემა მორწყვის ტრადიციულ, მიგდებით მორწყვით სისტემაზე ბევრად მომგებიანია ვინაიდან, ნაკლებ ელექტროენერგიას და სარწყავი წყლის ექვსჯერ ნაკლებ ხარჯს საჭიროებს. სარწყავი წყლის დაზოგვა განსაკუთრებით კახეთის რეგიონისათვის არის მნიშვნელოვანი თუ გავითვალისწიებთ სარწყავი სეზონის განმავლობაში ამ რეგიონში ნალექების ნაკლებობას, რაც შესაბამისად აისახება საირიგაციო სისტემებში წყლის დებეტზე. გარდა ამისა წვეთოვანი  სისტემის გამოყენება ხელს უწყობს მოსავლიანობის ზრდას.

პრეზენტაციას ესწრებოდნენ სოფლის მეურნეობის მინისტრის მოადგილე დავით გალეგაშვილი, გაერთიანებული სამელიორაციო სისტემების კომპანიის დირექტორი ლევან დვალი და კახეთის რეგიონის გუბერნატორის მოადგილე გივი მეტრეველი, რომლებმაც დამსწრეებს დეტალური ინფომაცია მიაწოდეს აღნიშნულ პროექტზე და წვეთოვანი მორწყვის სისტემის უპირატესობებზე.

პროექტის ღირებულება 2 500 000 ლარია. მოსახლეობის მხარდაჭერის და მათი მხრიდან  მორწყვის თანამედროვე ტექნოლოგიის  -  წვეთოვანი სისტემის გამოყენებისათვის მზაობის შემთხვევაში პროექტი წელს განხორციელდება.

საქართველოს სოფლის მეურნეობის სამინისტროს და გაერთიანებული სამელიორაციო სისტემების კომპანიას კახეთის რეგიონში განსახორციელებელი  კიდევ ორი ანალოგიური საპილოტე პროექტი აქვს შემუშავებული.  

ვიდეოს სანახავად გადადით ბმულზე