ქვემო ქართლის გუბერნატორის ადმინისტრაციაში შეხვედრა გაიმართა
ქვემო ქართლის სახელმწიფო რწმუნებულის-გუბერნატორის ადმინისტრაციაში საქართველოს სოფლის მეურნეობის მინისტრის მოადგილის გოჩა ცოფურაშვილის და საქართველოს გაერთიანებული სამელიორაციო სისტემების კომპანიის გენერალური დირექტორის ლევან დვალის სამუშაო შეხვედრა გაიმართა რეგიონის გუბერნატორ პაატა ხიზანიშვილთან და ადგილობრივი ხელისუფლების წარმომადგენლებთან.
საქართველოს გაერთიანებული სამელიორაციო სისტემების კომპანიის გენერალურმა დირექტორმა, ლევან დვალმა და კომპანიის ქვემო ქართლის რეგიონის დირექტორმა, ვახტანგ გარდაფხაძემ, შეხვედრაზე, რეგიონში სამელიორაციო ინფრასტრუქტურის მდგომარეობაზე, მიმდინარე და დაგეგმილ პროექტებზე და სამომავლო განვითარების სტრატეგიაზე ვრცელი პრეზენტაცია წარმოადგინეს. კომპანიის წარმომადგენლებმა და ქვემო ქართლის მუნიციპალიტეტების გამგებლებმა განიხილეს რეგიონში საირიგაციო სისტემებთან დაკავშირებული მიმდინარე საკითხები.
როგორც სოფლის მეურნეობის მინისტრის მოადგილემ, გოჩა ცოფურაშვილმა, აღნიშნა - „რეგიონალურ ხელისუფლებასთან მჭიდრო თანამშრომლობა და სამუშაო პროცესების კოორდინაცია სამინისტროს პრიორიტეტს წარმოადგენს“.
კომპანიის გენერალურმა დირექტორმა, ლევან დვალმა, ქვემო ქართლის რეგიონის სასოფლო-სამეურნეო მიწის ფართობების წყალუზრუნველსაყოფად მიმდინარე და დაგეგმილი სამუშაოების შესახებ საუბრისას აღნიშნა, რომ კომპანია მჭიდროდ თანამშრომლობს ადგილობრივ ხელისუფლებასთან, რათა სარწყავი და სადრენაჟე სისტემების სამომავლო სარეაბილიტაციო პროექტები რეგიონების სასოფლო-სამეურნეო საჭიროებების გათვალისწინებით დაიგეგმოს.
დღეისათვის, ქვემო ქართლის რეგიონში სამელიორაციო ინფრატსრუქტურის 10 ობიექტზე ტარდება სარეაბილიტაციო სამუშაოები. აღნიშნული გარდამავალი პროექტების განხორციელების შედეგად, ქვემო ქართლის რეგიონში, წყალუზრუნველყოფილი სასოფლო-სამურნეო მიწის ფართობი 17 890 ჰა-თი გაიზრდება, ხოლო 22 520 ჰა მიწის ფართობზე გაუმჯობესდება წყლის მიწოდება.
საქართველოს გაერთიანებული სამელიორაციო სისტემების კომპანია საქართველოს მასშტაბით, სამელიორაციო ინფრასტრუქტურის 37 ობიექტზე ახორციელებს სარეაბილიტაციო სამუშაოებს.
