რწყვის სეზონი ქვემო ქართლში გაიხსნა
გარდაბნის სარწყავ სისტემაში წყლის გაშვების ღონისძიებას ადგილობრივი ფერმერები ესწრებოდნენ. სოფლის მეურნეობის მინისტრმა ადგილობრივებთან რეგიონის განვითარებისთვის სამელიორაციო სისტემების გამართული ფუნქციონირების მნიშვნელობაზე ისაუბრა. ოთარ დანელიამ აღნიშნა, რომ წყალუზრუნველყოფილი ტერიტორიის 1/3 სწორედ ქვემო ქართლის რეგიონზე მოდის.
,,უკანასკნელი წლების განმავლობაში სამელიორაციო სისტემებზე ფართომასშტაბიანი სარეაბილიტაციო პროექტები ხორციელდება. ქვემო ქართლის რეგიონში საქართველოს გაერთიანებული სამელიორაციო სისტემების კომპანია ახორციელებს ყველაზე მასშტაბურ სარეაბილიტაციო ღონისძიებებს, რომლის დასრულების შემდეგ, 30 000 ჰექტარი სასოფლო-სამეურნეო მიწის ფართობი იქნება წყალუზრუნველყოფილი“, - განაცხადა ოთარ დანელიამ.
„დღეისათვის, სოფლის მეურნეობის სამინისტრო და საქართველოს გაერთიანებული სამელიორაციო სისტემების კომპანია სარწყავი და სადრენაჟე სისტემების მოწესრიგების პროგრამის ფარგლებში, მთელი საქართველოს მასშტაბით სარეაბილიტაციო სამუშაოებს 34 ობიექტზე ახორციელებს. ამ მიმართულებით აქტიურ მუშაობას მომავალშიც გააგრძელებს, რათა საქართველოს მასშტაბით სასოფლო-სამეურნეო სავარგულების მაქსიმალური წაყალუზრუნველყოფა მოხდეს“, - განაცხადა საქართველოს გაერთიანებული სამელიორაციო სისტემების კომპანიის დირექტორმა ლევან დვალმა.
რწყვის სეზონის გახსნის ღონისძებას ესწრებოდნენ სოფლის მეურნეობის მინისტრის მოადგილეები: ნოდარ კერესელიძე, დავთ გალეგაშვილი, იური ნოზაძე, ადგილობრივი ხელისუფლების, დონორი ორგანიზაციების და საქართველოს გაერთიანებული სამელიორაციო სისტემების კომპანიის წარმომადგენლები. სამელიორაციო ინფრასტრუქტურის ობიექტებზე სარეაბილოტაციო ღონისძიებები რწყვის სეზონის პარალელურად გაგრძელდება.
