ქვემო ალაზნის სარწყავ სისტემაში წყალი გაეშვა
საქართველოს გაერთიანებული სამელიორაციო სისტემების კომპანია საექსპლუატაციო ღონისძებების ფარგლებში, ყოველწლიურად ახორციელებს ქვემო ალაზნის სარწყავი სისტემის სათავე ნაგებობის სარემონტო სამუშაოებს. სამუშაოები დაახლოებით ერთი თვის განმავლობაში ტარდება. გასული თვის განმავლობაში გაიწმინდა სარწყავი სისტემის სათავე ნაგებობის მიმღები კამერა, მაგისტრალური არხის მიმდებარე ნაწილი. გარემონტდა გამშვები ფარები, ჯგუფური წყლის გამანაწილებლები, ღარები, შეიცვალა მილები. სამუშაოების დასრულებისთანავე ქვემო ალაზნის სარწყავი სისტემის მაგისტრალურ არხში წყალი გაეშვა.
აღნიშნული სისტემის სიგრძე 92 კილომეტრია და კახეთის რეგიონის 4 მუნიციპალიტეტის 20-ზე მეტი სოფლის დაახლოებით 8000 ჰექტარ სასოფლო-სამეურნეო დანიშნულების მიწის ფართობს ამარაგებს სარწყავი წყლით.
წყლის გაშვებას დაესწრნენ ადგილობრივი ფერმერები, საქართველოს გაერთიანებული სამელიორაციო სისტემების კომპანიის აქტივების მართვის დირექტორი ირაკლი სირაძე და ქვემო ალაზნის სერვის ცენტრის ხელმძღვანელი ილია ნერსეზაშვილი.
