ჩინეთის მთავრობამ საქართველოს სამელიორაციო ტექნიკა გადასცა
ჩინეთის სახალხო რესპუბლიკის მთავრობამ საქართველოს სოფლის მეურნეობის სამინისტროს შპს „საქართველოს მელიორაციას“ გრანტის ფარგლებში 245 ერთეული თანამედროვე სპეცტექნიკა (ექსკავატორი, სატვირთო, ბულდოზერი, ბეტონის ქარხნები და ამრევები, მაღალი გამავლობის ავტომანქანები, ტრაქტორები) და ელექტრომექანიკური დანადგარები გადასცა. სულ 10 მლნ 764 ათასი აშშ დოლარის ღირებულების. ტექნიკის გადაცემის ღონისძიებას საქართველოს პრემიერ-მინისტრი ირაკლი ღარიბაშვილი სოფლის მეურნეობის მინისტრი ოთარ დანელია, ჩინეთის სახალხო რესპუბლიკის ელჩი საქართველოში იუ ბინი და შპს „საქართველოს მელიორაციის“ გენერალური დირექტორი ლევან დვალი ესწრებოდნენ.
აღნიშნული ტექნიკა ჩინეთის სახალხო რესპუბლიკისგან მიღებული გრანტის მეორე ნაწილია. I ტრანში, 38 ერთეული, საქართველოს სოფლის მეურნეობის სამინისტროს 2013 წლის ივნისში გადაეცა.
სპეცტექნიკა შპს „საქართველოს მელიორაციას“ საშუალებას მისცემს სრულფასოვნად აწარმოოს სარწყავი არხების სარეაბილიტაციო სამუშაოები და ხელს შეუწყობს საქართველოში სამელიორაციო ინფრასტრუქტურის მოწესრიგების და განვითარების პროცესს.
