შპს „საქართველოს მელიორაციის“ წარმომადგენლები სამუშაო ვიზიტით იმყოფებოდნენ სომხეთის რესპუბლიკაში
სოფლის მეურნეობის სამინისტროს შპს „საქართველოს მელიორაციის“ წარმომადგენლები სამუშაო ვიზიტით იმყოფებოდნენ სომხეთის რესპუბლიკაში. ვიზიტი „საქართველოს მელიორაციის“ ინიციატივით შედგა. კომპანიის თანამშრომლებმა ვიზიტის ფარგლებში, შეხვედრები გამართეს სომხეთის რესპუბლიკის სოფლის მეურნეობის სამინისტროს წყალთა მეურნეობის სახელმწიფო კომიტეტსა და წყალთამომხმარებელთა ასოციაციაში. ვიზიტის მიზანი კოლეგებთან გამოცდილების გაზიარება და სომხეთის რესპუბლიკის წყალმომხმარებელთა ასოციაციაციისს მუშაობის სპეციფიკის გაცნობა იყო. შპს „საქართველოს მელიორაციის“ გენერალურმა დირექტორმა, ლევან დვალმა, სომეხ კოლეგებს კომპანიაში მიმდინარე ის რეფორმები გააცნო, რომლებიც კომპანიის მუშაობის ეფექტურობის ამაღლებას ისახავს მიზნად. შეხვედრისას საუბარი შეეხო ორ უწყებას შორის სამომავლო თანამშრომლობის პერსპექტივას. მათ შორის გაცვლითი სატრენინგო პროგრამების განხორციელებას გამოცდილების გაზიარების და ორივე უწყების პერსონალის სპეციალიზაციის ამაღლების ხელშეწყობის მიზნით. სამუშაო შეხვედრების შემდეგ, შ.პ.ს. „საქართველოს მელიორაციის“ თანამშრომლებმა ადგილობრივი საირიგაციო ინფრასტრუქტურის სხვადასხვა ობიექტი და 2010 წელს ექსპლუატაციაში შესული მარმარიკის წყალსაცავი დაათვალიერეს.
