საერთაშორისო საინჟინრო კომპანიასთან ხელშეკრულება გაფორმდა
სოფლის მეურნეობის სამინისტროს შპს „საქართველოს მელიორაციასა“ და „ეპტისა რუმინეთს“ შორის „ორიო“ გრანტის ფარგლებში, ხელშეკრულება გაფორმდა. ხელშეკრულების საფუძველზე ზემო სამგორის სარწყავი სისტემების რეაბილიტაციის საპროექტო-სახარჯთაღრიცხვო სამუშაოებს კონსორციუმი „ეპტისა რუმინეთი“ განახორციელებს.
ხელშეკრულებას ხელი მოაწერეს საქართელოს მელიორაციის გენერალურმა დირექტორმა, ლევან დვალმა და „ეპტისა რუმინეთის“ გენერალურმა დირექტორმა, ჰერარდო როის დე ლა პარა გონსალეს მოხენმა.
2014 წლის ნოემბერში საქართველოს მთავრობასა და ჰოლანდიის საგარეო საქმეთა სამინისტროს NL AGENCY-ს შორის გაფორმებული საგრანტო ხელშეკრულების საფუძველზე, საქართველოს უმსხვილესი სარწყავი და სადრენაჟე სისტემის რეაბილიტაციისათვის, საქართველო გრანტის სახით მიიღებს 15,5 მილიონ ევროს. თვითდინებით სარწყავი ქსელი ემსახურება 30 000 ჰა-ზე მეტ ფართობს.
ღონისძიებას ესწრებოდნენ „საქართველოს მელიორაციის“, „ეპტისა რუმინეთის“ და ნიდერლანდების საელჩოს წარმომადგენლები.
ზემო სამგორის სარწყავი სისტემის რეაბილიტაციის შედეგად, გარდაბნისა და საგარეჯოს მუნიციპალიტეტების 19 სოფლის 30 000 ჰა-ზე მეტი ფართობი იქნება უზრუნველყოფილი სარწყავი წყლით. აღნიშნული ფართობით ისარგებლებს 60 000 -მდე ბენეფიციარი.
სარწყავი და სადრენაჟე სისტემების რეაბილიტაცია მნიშვნელოვნად შეუწყობს ხელს სოფლის მეურნეობის განვითარებას საქართველოში.
