ალაზნისპირა მიწების დამშრობი სისტემის რეაბილიტაცია
სოფლის მეურნეობის მინისტრი ოთარ დანელია, კახეთის მხარის გუბერნატორი ირაკლი შიოლაშვილი და შპს „საქართველოს მელიორაციის“ გენერალური დირექტორი ლევან დვალი ალაზნისპირა მიწების დამშრობი სისტემის სარეაბილიტაციო სამუშაოების მიმდინარეობას ადგილზე გაეცნენ. სოფლის მეურნეობის მინისტრი გურჯაანის მუნიციპალიტეტში მდებარე შპს ,,საქართველოს მელიორაციის“ განახლებულ რეგიონალური ოფისშიც იმყოფებოდა. ოთარ დანელია სამსახურის მუშაობის პროცესს გაეცნო და თანამშრომლებს შეხვდა.
ალაზნისპირა მიწების დამშრობი სისტემის რეაბილიტაცია გურჯაანის და სიღნაღის მუნიციპალიტეტების ტერიტორიაზე მიმდინარეობს. სარეაბილიტაციო სამუშაოების პირველი ეტაპი თებერვლის ბოლოს დასრულდება და დასრულების შემდეგ, გურჯაანის მუნიციპალიტეტის სამი სოფლის - კარდენახი, ბაკურციხე, კოლაგი - მოსახლეობა 3 000 ჰა-მდე სასოფლო-სამეურნეო მიწის ფართობზე დრენაჟის სერვისით ისარგებლებს. პროექტის ღირებულება 2 591 000 ლარია.
კახეთის რეგიონში სოფლის მეურნეობის სამინსიტროს შპს „საქართველოს მელიორაციის“ მიერ ჩატარებული სამუშაოების შედეგად წყალუზრუნველყოფილი ფართობი 13 690 ჰექტრამდე გაიზარდა, ხოლო ნიადაგის დაშრობა - 925 ჰექტარზე ხორციელდება. 2016 წლის სარეაბილიტაციო პროგრამით კახეთის რეგიონში იგეგმება 15 სარეაბილიტაციო პროექტის დაწყება ჯამური ღირებულებით 12 943 679 ლარი. აღნიშნული პროექტების დასრულების შემდეგ მელიორირებული ფართობი რეგიონში 6 000 ჰა-ით გაიზრდება.
