იმერეთში ვანი-სამტრედიის დამშრობ მასივზე სამუშაოები მიმდინარეობს
გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ სამელიორაციო სისტემების მოწესრიგების ფარგლებში, იმერეთში ვანი-სამტრედიის დამშრობ მასივზე სამუშაოებს ატარებს. ამ დროისათვის, სამუშაოები სოფლებში - მთისძირსა და გომში მიმდინარეობს, სადაც ჯამში 5 კმ-ზე მეტი ქსელი იწმინდება.
ჩატარებული ღონისძიებების შედეგად, არხისა და კოლექტორების გამტარუნარიანობა გაიზრდება, რაც 250 ჰექტარ სასოფლო-სამეურნეო სავარგულებსა და მიმდებარედ არსებულ საკარმიდამო ნაკვეთებს დატბორვისაგან დაიცავს. ვანი-სამტრედიის დამშრობი მასივის რეაბილიტაცია მიზნად ისახავს სადრენაჟე ინფრასტრუქტურის გამართულ ფუნქციონირებას და სოფლის მეურნეობის პოტენციალის გაზრდას.
იმერეთში, 2012-2024 წლებში განხორციელებული სამელიორაციო ინფრასტრუქტურული პროექტების შედეგად, 12000 ჰექტარზე მეტი სასოფლო-სამეურნეო მიწის ფართობია წყალუზრუნველყოფილი, სარწყავი წყლის მიწოდება 15 265 ჰექტარზე გაუმჯობესდა, დრენირებული მიწის ფართობის რაოდენობა 3 385 ჰექტარია.
