წყლის მსოფლიო დღისადმი მიძღვნილი ფორუმი საქართველოს ტექნიკურ უნივერსიტეტში
საქართველოს ტექნიკურ უნივერსიტეტში მსოფლიო წყლის დღისადმი მიძღვნილ ფორუმში შპს „საქართველოს მელიორაციის“ წყლის რესურსების მართვის, ენერგეტიკისა და სემეკ-თან ურთიერთობის დეპარტამენტის უფროსმა მამელი ქობალიამ მიიღო მონაწილეობა. მამელი ქობალიამ მელიორაციის სექტორში არსებულ გამოწვევებსა და სარწყავი წყლის რაციონალური გამოყენების მნიშვნელობაზე ისაუბრა.
„კლიმატური პირობებიდან გამომდინარე, სულ უფრო მეტი მნიშვნელობა ენიჭება წყლის რესურსების ეფექტიან გამოყენებას. არსებული რესურსების დაზოგვის მიზნით, აუცილებელია, დარგში თანამედროვე ტექნოლოგიების ინტენსიური დანერგვა, რაც გულისხმობს, როგორც მსოფლიოში უკვე კარგად აპრობირებულ წვეთოვან, ისე ახალ საირიგაციო სისტემებს და დანადგარებს, რომლებიც საშუალებას იძლევა, შემცირდეს წყლის ხარჯი“, - განაცხადა მამელი ქობალიამ.
დეპარტამენტის უფროსმა ყურადღება წყალსაცავების მშენებლობა-რეაბილიტაციის მნიშვნელობის საკითხზეც გაამახვილა და აღნიშნა, რომ კომპანია, არსებული წყალსაცავების აღდგენა-რეაბილიტაციის პარალელურად, გეგმავს ილტოს წყალსაცავის მოწყობას, რომელიც სავეგეტაციო რწყვის პერიოდში უზრუნველყოფს ქვემო და ზემო ალაზნის სარწყავი სისტემების ზონაში არსებული 43 000 ჰა სასოფლო-სამეურნეო სავარგულის სტაბილურ წყალმომარაგებას.
აღსანიშნავია, რომ წყლის რესურსის რაციონალურად გამოყენების ხელშესაწყობად და დანაკარგების შესამცირებლად, შპს „საქართველოს მელიორაცია“ აქტიურად ახორციელებს სამელიორაციო ინფრასტრუქტურულ პროექტებს, რომელიც თავისთავად გააუმჯობესებს წყლის მიწოდებას და შეამცირებს წყლის დანაკარგებს სისტემებში. სამელიორაციო ინფრასტრუქტურის სისტემური განვითარება, წყლის აღრიცხვის პოლიტიკის სწორად წარმოება, მისი ნორმირებული და წინასწარ განსაზღვრული გეგმის მიხედვით ფერმერისთვის მიწოდება და სწორი მოლოდინის შექმნა, ხელს შეუწყობს ფერმერებს სწორად დაგეგმონ თავიანთი სამეწარმეო საქმიანობა გრძელვადიან პერსპექტივაში, გამოიყენონ თანამედროვე მორწყვის მეთოდები, რაც პირდაპირპროპორციულად არის დაკავშირებული წყლის რესურსების რაციონალურ ხარჯვასთან.
