თენგიზ ნასარიძემ წყლის დღისადმი მიძღვნილ ფორუმში მიიღო მონაწილეობა
შპს „საქართველოს მელიორაციის“ გენერალურმა დირექტორმა, თენგიზ ნასარიძემ საქართველოს ტექნიკურ უნივერსიტეტში მსოფლიო წყლის დღისადმი მიძღვნილ ფორუმში მიიღო მონაწილეობა.
სიტყვით გამოსვლისას, თენგიზ ნასარიძემ საირიგაციო სექტორის წინაშე არსებულ გამოწვევებსა და სარწყავი წყლის რაციონალური გამოყენების მნიშვნელობაზე ისაუბრა.
„კლიმატური პირობებიდან გამომდინარე, სულ უფრო მეტი მნიშვნელობა ენიჭება წყლის რესურსების ეფექტიან გამოყენებას. არსებული რესურსების დაზოგვის მიზნით, აუცილებელია დარგში თანამედროვე ტექნოლოგიების ინტენსიური დანერგვა, რაც გულისხმობს, როგორც მსოფლიოში უკვე კარგად აპრობირებულ წვეთოვან, ისე ახალ საირიგაციო სისტემებს და დანადგარებს, რომლებიც საშუალებას იძლევა, შემცირდეს წყლის ხარჯი“, - განაცხადა თენგიზ ნასარიძემ.
თენგიზ ნასარიძემ ქვეყანაში წყალსაცავების მშენებლობა-რეაბილიტაციის მნიშვნელობის საკითხზეც ისაუბრა და ყურადღება სექტორში ახალგაზრდა, კვალიფიციური კადრების საჭიროებასა და აუცილებლობაზე გაამახვილა.
საქართველოს ტექნიკურ უნივერსიტეტში გამართულ ფორუმში დარგობრივი ორგანიზაციების ხელმძღვანელები და მეცნიერები მონაწილეობდნენ.
22 მარტს, გაერთიანებული ერების ორგანიზაციის გენერალური ასამბლეის გადაწყვეტილებით, წყლის რესურსების დაცვის საერთაშორისო დღე აღინიშნება. ამ დღის დაწესებისა და აღნიშვნის მიზანია, მსოფლიო საზოგადოებას კიდევ ერთხელ შეახსენოს, როგორი მნიშვნელობა აქვს წყლის რესურსების მოფრთხილებას და დაცვას.
