შპს „საქართველოს მელიორაციას“ თურქეთის რესპუბლიკის დელეგაცია ესტუმრა
გარემოს დაცვისა და სოფლის მეურნეობის სამინისტროს შპს „საქართველოს მელიორაციას“ თურქეთის რესპუბლიკის სოფლისა და სატყეო მეურნეობის სამინისტროსა და საირიგაციო კომპანიის - სახელმწიფო ჰიდრავლიკური სამუშაოების გენერალური დირექტორატის (DSI) წარმომადგენლები ესტუმრნენ.
კვირის განმავლობაში საქართველოს მელიორაციაში გამართულ შეხვედრებზე მხარეებმა კომპანიის სერვისების, სამელიორაციო ინფრასტრუქტურული პროექტებისა და მიღწეული შედეგების თაობაზე იმსჯელეს.
თურქმა სპეციალისტებმა ქართველ კოლეგებს წყალმომხმარებელთა ორგანიზაციების ჩამოყალიბებასა და სატარიფო პოლიტიკასთან დაკავშირებით საკუთარი გამოცდილება გაუზიარეს. საუბარი შეეხო წყალგანაწილების ლიმიტების დადგენის მეთოდოლოგიას და ჰიდრომეტრიას, საირიგაციო ინფრასტრუქტურის ექსპლუატაციისა და მოვლა-შენახვის საკითხებს.
დელეგაციის წევრებმა ქვემო სამგორის სარწყავი სისტემა, პალდოს სათავე ნაგებობა, სიონისა და თბილისის წყალსაცავების ჰიდროტექნიკური ნაგებობები დაათვალიერეს, გაეცნენ სერვისცენტრების მუშაობის სპეციფიკას.
მხარეებმა საქართველოს და თურქეთს შორის არსებული ეფექტიანი და ნაყოფიერი თანამშრომლობის მნიშვნელობაზე ისაუბრეს და სამომავლო ურთიერთობის პერსპექტივები განიხილეს.
ვიდეოს სანახავად გადადით ბმულზე
