შეხვედრა საქართველოს მელიორაციაში

გარემოს დაცვისა და სოფლის მეურნეობის მინისტრმა, ლევან დავითაშვილმა და შპს „საქართველოს მელიორაციის“ ხელმძღვანელებმა, სამუშაო შეხვედრაზე, განხორციელებული სამელიორაციო ინფრასტრუქტურული პროექტების შედეგები შეაჯამეს და სამომავლო გეგმები განიხილეს.
როგორც საქართველოს მელიორაციის გენერალურმა დირექტორმა, დავით წითლიძემ აღნიშნა, მნიშვნელოვანი და მასშტაბური პროექტები განხორციელდა ფერმერების წყლით უზრუნველსაყოფად.
მელიორირებული სასოფლო-სამეურნეო მიწის ფართობი 3.5-ჯერ გაიზარდა და, დღეის მდგომარეობით, 200 ათას ჰექტარს შეადგენს. გასარწყავიანდა ისეთი სავარგულები, რომელიც ათეულობით წელი მოკლებული იყო საირიგაციო მომსახურებას.
შედეგად, ათასობით ფერმერს საშუალება მიეცა თავიანთ ფართობებში მოიყვანონ უფრო მეტი და კონკურენტუნარიანი სასოფლო-სამეურნეო კულტურები, რასაც სარწყავი წყლის უქონლობის გამო ვერ ახერხებდნენ.
ქვეყანაში სოფლის მეურნეობის განვითარების პარალელურად, სარწყავ წყალზე მოთხოვნილება იზრდება, შესაბამისად, გასულ წელს, საირიგაციო მომსახურებაზე დაკონტრაქტებული ფართობების მაქსიმალური მაჩვენებელი დაფიქსირდა.
შეხვედრაზე, მინისტრმა განსაკუთრებული ყურადღება დაუთმო დარგში თანამედროვე ტექნოლოგიების ინტენსიურ დანერგვის საკითხს, რაც გულისხმობს, როგორც მსოფლიოში უკვე კარგად აპრობირებულ წვეთოვან, ისე ახალ საირიგაციო სისტემებს და დანადგარებს, რომლებიც საშუალებას მისცემს მელიორაციის სამსახურს შეამციროს დანაკარგები, ხარჯები და გაზარდოს მომსახურების ხარისხი.
კომპანიისთვის სამელიორაციო ინფრასტრუქტურის რეაბილიტაცია-მშენებლობა 2022 წელსააც პრიორიტეტად რჩება. საშუალოვადიანი სამოქმედო გეგმის მიხედვით, გარდამავალი და ახალი სარეაბილიტაციო პროექტების რაოდენობა 55-ია, რომელთა განხორციელების შედეგად, რეგულარულად, 20 330 ჰექტარი სასოფლო-სამეურნეო მიწის ფართობი მოირწყვება, ხოლო სარწყავი წყლის მიწოდება 22 180 ჰექტარზე გაუმჯობესდება.
შეხვედრაზე აღინიშნა, რომ სამელიორაციო ინფრასტრუქტურული პროექტების განხორციელებაში უმნიშვნელოვანესია ის საერთაშორისო მხარდაჭერა, რომელსაც ქვეყანა არაერთი დონორი ორგანიზაციისგან იღებს.
საქართველოს მელიორაციაში გამართულ შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და მოადგილეები ოთარ შამუგია, იური ნოზაძე სოლომონ პავლიშვილი ესწრებოდნენ.