ქვემო ქართლის სამხარეო ადმინისტრაციაში შეხვედრაზე სარწყავი სეზონის მიმდინარეობასა და არსებულ გამოწვევებზე ისაუბრეს
სარწყავი სეზონის მიმდინარეობასა და არსებულ გამოწვევებზე ისაუბრეს ქვემო ქართლის სამხარეო ადმინისტრაციაში გამართულ შეხვედრაზე შპს „საქართველოს მელიორაციის“ გენერალურმა დირექტორმა, დავით წითლიძემ და მხარის სახელმწიფო რწმუნებულმა, შოთა რეხვიაშვილმა.
როგორც შეხვედრაზე აღინიშნა სარწყავი ინფრასტრუქტურა სეზონს მომზადებული შეხვდა და მხარეში რწყვის სეზონი დადგენილი გრაფიკით მიმდინარეობს. ძირითად სასოფლო-სამეურნეო სავარგულებს წყალი შეუფერხებლად მიეწოდება. თუმცა, არის ლოკალური შემთხვევები, როდესაც ავარიული გამორთვის შედეგად, წყლის მიწოდება დროებით იზღუდება, რაც მელიორაცის სამსახურის მყისიერი რეაგირების საგანი ხდება.
2020 წელს ქვემო ქართლში კომპანიამ სამელიორაციო ინფრასტრუქტურაზე მნიშვნელოვანი სარეაბილიტაციო სამუშაოები ჩაატარა, თუმცა უნდა აღინიშნოს, რომ სამუშაოები 2021 წელსაც აქტიურად გაგრძელდება, რაც კიდევ უფრო გაზრდის რეგიონში წყალუზრუნველყოფილი ფართობების რაოდენობას.
შევხედრაზე აგრეთვე ისაუბრეს მთავრობის ანტიკრიზისულ გეგმაზე, რომელიც სოფლის მეურნეობაში, კერძოდ კი მელიორაციაში დახმარების მნიშვნელოვან პაკეტს მოიცავს.
საქართველოში, ახალი კორონავირუსის (COVID-19) გავრცელებით გამოწვეული ეკონომიკური ზიანის შემსუბუქებისა და ეკონომიკის სტიმულირების მიზნით, საქართველოს მთავრობის გადაწყვეტილებით:
· შპს „საქართველოს მელიორაციის“ მიმართ არსებული 8 000 000 ლარამდე ოდენობის დავალიანება, რომელიც 2020 წლამდე წარმოიქმნა, სრულად ჩამოეწერება 42 000-მდე ფერმერს;
· 42 ათასზე მეტი ფერმერი 2020 წელს სამელიორაციო მომსახურების საფასურისგან გათავისუფლდება, რაც 1 ჰექტარზე 75 ლარამდე გადასახადს გულისხმობს.
დახმარება განკუთვნილია ყველა ფერმერისთვის, ვინც სარგებლობს ირიგაციისა და დრენაჟის მომსახურებით10 ჰექტარამდე მიწის ფართობზე.
ქვემო ქართლის სამხარეო ადმინისტრაციაში გამართულ შეხვედრას მუნიციპალიტეტების გამგებლები და საქართველოს მელიორაციის წარმომადგენლები ესწრებოდნენ.
