სამუშაო შეხვედრა სამეგრელო-ზემო სვანეთის სახელმწიფო რწმუნებულთან
მელიორაციის კუთხით ფოთში არსებულ საჭიროებებზე და განსახორციელებელ პროექტებზე იმსჯელეს შპს ,,საქართველოს მელიორაციის" ექსპლუატაციის დირექტორმა, გიორგი ხუბუამ, სამეგრელო-ზემო სვანეთის სახელმწიფო რწმუნებულმა, ალექსანდრე მოწერელიამ და ფოთის ადგილობრივი ხელისუფლების წარმომადგენლებმა.
შეხვედრის შემდეგ ის ადგილები დაათვალიერეს, სადაც სამუშაოების განხორციელება იგეგმება. პროექტის ფარგლებში მდინარე რიონის ქალაქში გამავალი არხი დანალექი შლამისა და ნატანისაგან გაიწმინდება.
აღდგენითი სამუშაოები ჩაუტარდება ნაპირდამცავ ჯებირებს. არხი წამში 400 კუბურ მეტრს გაატარებს, რაც მნიშვნელოვანია რიონის ჰიდროდინამიური რეჟიმისთვის, შავი ზღვის სანაპირო ზოლის სტაბილიზაციისა და წყალდიდობის პრევენციისთვის.
სამუშაოები აგრეთვე ითვალისწინებს მეშვიდე კილომეტრის ნიშნულიდან ზღვამდე რიონის ფსკერისა და ზღვის შესართავთან ამჟამად მოსილული მარცხენა შტოს გაწმენდას.
ამჟამად მუშაობა მიმდინარეობს ქალაქ ფოთში გამავალი მდინარე რიონის არხის რეაბილიტაციის დეტალური საინჟინრო პროექტის შედგენაზე.
