ოთარ შამუგია დასავლეთში ინფრასტრუქტურულ პროექტებს გაეცნო
შპს „საქართველოს მელიორაციის“ გენერალურმა დირექტორმა დასავლეთში არსებული სამელიორაციო ინფრასტრუქტურული ობიექტები დაათვალიერა.
ოთარ შამუგია მიმდინარე და დასრულებულ სამელიორაციო პროექტებს გაეცნო. დაათვალიერა რეაბილიტირებული აჯამეთის და მაშველის სარწყავი სისტემების სათავე ნაგებობები.
იმყოფებოდა ოზურგეთის და აბაშის მუნიციპალიტეტებში, სადაც მერეკრძელა-კაპროვანის და ანჯელის მასივის დამშრობი სისტემების სარეაბილიტაციო სამუშაოები მიმდინარეობს.
გურიაში მიმდინარე მაგისტრალური არხების 4 კილომეტრიანი წყალგამყვანი მონაკვეთის აღდგენითი სამუშაოები, ჭარბწყლიანობისგან დაიცავს სოფელ ნატანების 640 ჰექტარ მიწის ფართობს, ხოლო ანჯელის მასივის სამუშაოების შედეგად, მოსახლეობა დამატებით 500 ჰექტარ სასოფლო-სამეურნეო მიწის ფართობზე ისარგებლებს სადრენაჟე მომსახურებით.
გენერალურმა დირექტორმა კომპანიის წარმომადგენლებთან ერთად, ადგილზე განიხილა სამომავლო გეგმები და ის პროექტები, რომლებსაც უახლოეს პერიოდში კომპანია დასავლეთ საქართველოში განახორციელებს.
