სარწყავი სისტემების რეაბილიტაცია გრძელდება
საქართველოს სოფლის მეურნეობის სამინისტრო და საქართველოს გაერთიანებული სამელიორაციო სისტემების კომპანია სარწყავი სისტემების რეაბილიტაციას აგრძელებს. ქვემო სამგორის სარწყავი სისტემის, მანავი-თოხლიაურის მაგისტრალური არხის სარეაბილიტაციო სამუშაოები საქართველოს სოფლის მეურნეობის მინისტრმა, ოთარ დანელიამ და გაერთიანებული სამელიორაციო სისტემების კომპანიის დირექტორმა, ლევან დვალმა, დაათვალიერეს.
რეაბილიტაციის ფარგლებში, მანავი-თოხლიაურის მაგისტრალური არხის 2,8 კმ-იანი სიგრძის მონაკვეთი ნატანისგან გაიწმინდება.
მიმდინარე ღონისძიებების შედეგად, საგარეჯოს მუნიციპალიტეტის სოფლების თოხლიაურისა და მანავის 2000 ჰექტარი მიწის ფართობი გასარწყავდება.
„ჩვენ არა მხოლოდ საგარეჯოს რაიონში, ზოგადად მთელ კახეთში, სადაც შესაძლებელი იქნება მივიყვანთ წყალს. სამუშაოები ინტენსიურად გაგრძელდება მთელი ზამთრის და გაზაფხულის მანძილზე, რათა სეზონზე მაქსიმალურად ავითვისოთ ტერიტორიები და წყალუზრუნველყოფა იყოს ყველგან, სადაც ამის შესაძლებლობა ფიზიკურად გვექნება“- განაცხადა ოთარ დანელიამ.
სარემონტო სამუშაოები, რომელიც 2014 წლის აგვისტოში დაიწყო და ამავე წლის დეკემბრის ბოლოსთვის დასრულდება, საქართველოს გაერთიანებული სამელიორაციო სისტემების კომპანია საკუთარი ძალებით ახორციელებს. მისი ღირებულებაა 84 000 ლარი.
როგორც კომპანიის დირექტორმა, ლევან დვალმა, აღნიშნა -„კომპანია უახლოეს პერიოდში ქვემო სამგორის სარწყავ სისტემაზე მასშტაბური პროექტის განხორციელებას დაიწყებს, რომლის დასრულების შემდეგ, საგარეჯოს მუნიციპალიტეტში დამატებით 1300 ჰექტარი სასოფლო სამეურნეო მიწის ფართობი გახდება წყალუზრუნველყოფილი“
