სამუშაო შეხვედრა ქვემო ქართლის რეგიონის ხელმძღვანელობასთან
შპს „საქართველოს მელიორაციის“ ქვემო ქართლის რეგიონული სამსახურის უფროსმა, დავით კიკოლაშვილმა, ქვემო ქართლში სახელმწიფო რწმუნებულ-გუბერნატორ გრიგოლ ნემსაძესთან შეხვედრა გამართა, რომელსაც გუბერნატორის პირველი მოადგილე ალექსანდრე მეტრეველი და მუნიციპალიტეტების მერები დაესწრნენ.
შეხვედრაზე იმსჯელეს რეგიონში სარწყავ სისტემებზე არსებულ ვითარებაზე, განხორციელებულ და მიმდინარე პროექტებზე. რეგიონული სამსახურის უფროსმა ადგილობრივი ხელისუფლების წარმომადგენლებს მიაწოდა ინფორმაცია რეგიონში სამელიორაციო ინფრასტრუქტურაზე დაგეგმილი სარეაბილიტაციო პროექტებისა და საექსპლუატაციო ღონისძიებების შესახებ, რომელსაც „საქართველოს მელიორაცია“ უახლოეს პერიოდში განახორციელებს. აღნიშნული პროექტების განხორციელებით მოგვარდება და გაუმჯობესდება ერთწლიანი და მრავალწლიანი კულტურების წყალუზრუნველყოფა, შესაბამისად, გაიზრდება საშუალო საჰექტარო მოსავლიანობა.
ადგილობრივი ხელისუფლების წარმომადგენლებმა დაგეგმილ პროექტებთან დაკავშირებით მოსაზრება გაუზიარეს შეხვედრის მონაწილეებს და გამოთქვეს მზადყოფნა თავიანთი კომპეტენციის ფარგლებში მაქსიმალურად შეუწყონ ხელი სამუშაოების წარმატებით განხორციელებას.
სამუშაო შეხვედრა კითხვა-პასუხის რეჟიმში მიმდინარეობდა.
