ერწოს დამშრობი სისტემის რეაბილიტაცია დაიწყო

სოფლის მეურნეობის სამინისტროს შპს „საქართველოს მელიორაციამ“ თიანეთის მუნიციპალიტეტში, ერწოს დამშრობი სისტემის რეაბილიტაცია დაიწყო.
სარეაბილიტაციო სამუშაოების მიმდინარეობას სოფლის მეურნეობის მინისტრის მოადგილე დავით გალეგაშვილი და შპს “საქართველოს მელიორაციის“ გენერალური დირექტორი ლევან დვალი მცხეთა-მთიანეთის რეგიონის სახელმწიფო რწმუნებულ-გუბერნატორ ნუგზარ ყიფიანთან და ადგილობრივი თვითმმართველობის წარმომადგენლებთან ერთად გაეცნენ. 
ერწოს დამშრობ სისტემაზე სამუშაოები ორ ათეულ წელზე მეტია არ ჩატარებულა. მიმდინარე წლის აგვისტოში სარეაბილიტაციო პროექტის პირველი ეტაპი დაიწყო, რომელიც მდინარე აძიძის კალაპოტის ნატანი და ნალექი გრუნტისაგან გაწმენდას ითვალისწინებს. მიმდინარეობს სამუშაოების მომდევნო ეტაპების პროექტირება.
ობიექტის სრული რეაბილიტაციის შემდეგ თიანეთის მუნიციპალიტეტის 14 სოფლის მოსახლეობას დაახლოებით 3 000 ჰექტარ ტერიტორიაზე საშუალება მიეცემა აწარმოონ სასოფლო-სამეურნეო სამუშაოები.
გარდა აღნიშნული პროექტისა, მცხეთა-მთიანეთის რეგიონში, დუშეთის მუნიციპალიტეტში ნარეკვავის წყალსაცავის რეაბილიტაციაც მიმდინარეობს. 
შპს „საქართველოს მელიორაცია“ დღეისათვის საქართველოს მასშტაბით სამელიორაციო ინფრასტრუქტურის 25 ობიექტზე ახორციელებს სარეაბილიტაციო სამუშაოებს.

ვიდეოს სანახავად გადადით ბმულზე

subscribe news